Showing posts with label Ganesh Temples. Show all posts
Showing posts with label Ganesh Temples. Show all posts

Sunday, March 13, 2011

கணபதி தரிசனம் - 3

கணபதி தரிசனம் - 3
       || ஜெய் கணேச ஜெய் கணேச ஜெய் கணேச தேவா ||
சென்னையிலிருந்து அப்பாவிற்கு வேலூருக்கு (வட ஆற்காடு) மாற்றல் ஆகியது. வேலூரில் விநாயகர் கோயில் அவ்வளவு காணவில்லை. பள்ளிக்குச் செல்லும் வழியில் வேலூர் முனிசிபாலிட்டி வளாகத்திற்குள் ஒரு ஆஞ்சநேயர் கோயில் தான் இருந்தது. ஆகவே அவரை கும்பிட்டு பள்ளிக்கு செல்வதுண்டு. அப்பாவிற்கு மாற்றல் கிடைத்து ஊரை விட்டு செல்லும் முன் கடைசியாக இந்த ஆஞ்சனேயருக்கு சிறப்பு பூஜை செய்து வடை மாலை சாற்றி கிளம்பியது இன்றும் நினைவில் அழியாமல் இருக்கிறது, அப்போது ரஜினி போல் தலைமுடி முகத்தில் வந்து விழும். அர்ச்சகர் பொட்டு வைக்க வரும் போதெல்லாம், தலைமுடி முகத்தில் விழாமல் இருக்க, அதை விரலால் பிடித்துக் கொள்வதுண்டு. இதற்காக அவர் அப்பாவிடம் போட்டுக் கொடுத்து திட்டு வாங்கியதும் உண்டு. ஆனால் வேலூருக்கு அருகில் விரிஞ்சிபுரம் என்கிற இடத்தில் உள்ள பிள்ளையார் கோயில் மிகவும் பிரசித்தி வாய்ந்தது. அதைப் பற்றி வேறொரு பதிவில் பார்ப்போம்.

வேலூருக்கு அடுத்த வந்தது சேலம். ஒரு சம்மர் காலத்தில் வந்தோம். மாங்கனி நகரம் என்று படித்ததுண்டு, கேள்விப்பட்டதுண்டு. ஆனால் உண்மையில் பார்த்த பொழுது தான் அதன் சிறப்பு தெரிந்தது. வீடு சின்னக்கடை தெரு அருகில். சின்னக்கடை வீதி மிகவும் பரபரப்பான பஜார் தெரு. சேலம் மாநகரின் நடுவில் அமைந்திருந்தது. எது வேண்டுமானாலும் இங்கு தான் வர வேண்டும். நான் குறிப்பிடும் கால கட்டம் 1980 - 1990. இப்போது சேலம் மிகவும் பரந்து விரிந்துள்ளது. எங்கு கண்டாலும் பலபொருள் அங்காடிகளும், சூப்பர் மார்க்கெட்டும், காய்கறி விற்பனை நிலையங்களும் வந்துள்ளன. சின்னக்கடை வீதி பஜாரில் உள்ள மண்டியில் இருந்து மாம்பழ டப்பாக்கள் உலகின் பல்வேறு இடங்களுக்கு அனுப்பப்படும். மாம்பழ சீசனில் அந்த தெருவில் நடந்து செல்வதே ஒரு அனுபவம். மாம்பழ வாசனை ஆளை தூக்கி அடிக்கும். இத்தனைக்கும் நடுவில் நமது விநாயகர் உட்கார்ந்து கொண்டு இருக்கிறார்.

அதில் முதலில் வருவது மூன்று பிள்ளையார். சின்னக்கடை வீதியின் ஆரம்பத்தில் இவர் கோயில் இருக்கிறது. ஆரம்பத்தில் சிறு கோயிலாக இருந்தது பின்னர் 90 ல் கும்பாபிஷேகம் நடந்து இப்போது பெரிய சன்னதியாக இருக்கிறது. அடுத்து அந்தத் தெருவின் கடைசியில் ராஜவீதி இணையும் Junction -ல் பிரசித்தி பெற்ற ராஜ கணபதி கோயில் உள்ளது.
ராஜகணபதி, சேலம் 
 
ராஜகணபதி பற்றி மேலும் தெரிந்து கொள்ள கீழ் உள்ள வலைத்தளத்தில் சென்று பார்க்கவும்.

மூன்றாவதாக டவுன் ரயில்வே ஸ்டேசன் தெருவில் உள்ள கணபதி. மூர்த்தி மிகவும் சிறியது ஆனால் கீர்த்தி மிகவும் பெரியது. தினமும் பள்ளிக்கு செல்லும் வழியில் இருப்பதால் இவரிடம் என் ஆஜர் கட்டாயம் உண்டு. கடைசியில் வருபவர், அம்மாபேட்டை மெயின் ரோடில் பாவடி மகளிர் உயர் நிலைப் பள்ளி அருகில் உள்ள பிள்ளையார் கோயில். நண்பன் வீட்டுக்கு சாயங்கால வேளையில் செல்லும் போது இவரை கும்பிடாமல் சென்றதில்லை.

இத்தனை விநாயகர்களும் என்னை கைவிடவில்லை.  கல்லூரியில் பி.காம் சேர்ந்த பின்னர் நிறைய நேரம் கிட்டியது. மற்ற நண்பர்களை போல சுருக்கெழுத்து, தட்டெழுத்து பயில மனம் இசையவில்லை. சோம்போறித்தனம் என்று இல்லை.  வருங்காலத்தில் எல்லாம் கணிணி, எங்கும் கணிணி என்று இருக்கப் போகிறது, அப்போது இந்த திறமை அத்தனை உபயோகப் படாது என்று உள்ளுணர்வு சொல்லியதால் போகவில்லை. மாறாக பெரிதாக வர வேண்டுமென்றால் ஏதாவது professional course செய்ய வேண்டும் என்று தோணியது. ஆகையால் கிடைத்த நேரம் எல்லாம் கல்லூரி லப்ரரியில் நிதி நிர்வாகம், கணக்கியலில் உள்ள உயர் வேலை வாய்ப்புகள் என்ன, அந்த வாய்ப்புக்கு ஏற்ற தகுதிகள் என்ன என்று சுமார் ஒரு மாத காலம் ஆராய்ச்சி செய்து பின்னர் பி.காம் படித்துக் கொண்டே cost and works accountancy (ICWA) படிக்கலாம் என்று முடிவு செய்து அந்த இன்ஸ்ட்டிட்யூட் (institute) க்கு விண்ணப்பித்தால் அவர்கள் அதில் சேருவதற்கான தகுதிகள் மாற்றப்பட்டுள்ளன என்றும், குறைந்த பட்ச தகுதி பட்டப்படிப்பு அல்லது நுழைவு தேர்வில் தேர்ச்சி பெற்றிருக்க வேண்டும் என்று சொல்லிவிட்டனர். சரி முன் வைத்த காலை பின் வைக்க வேண்டாம் என்று நுழைவு தேர்வுக்கு விண்ணப்பித்து விட்டு, தேர்வு நாளுக்குக்காக காத்திருந்தேன். அந்த நாட்களில் சேலத்தில் centre கிடையாது. திருச்சி, கோயம்புத்தூர், மதுரை அல்லது சென்னை செல்ல வேண்டும். நான் திருச்சி செலக்ட் செய்து அங்கு பரீட்சை எழுத சென்றேன். பரீட்சை ஒன்றும் அத்தனை கடினம் கிடையாது. சிம்பிள் ஜெனரல் அறிவு, ஆங்கில அறிவு திறன், கணக்கு திறமை. ஆனால் பாஸ் பெர்செண்ட் மிகவும் குறைவு. பரீட்சை எழுதி முடித்தபின் கிடைத்த நேரத்தில் நண்பர்களுடன் முதல் முறையாக திருச்சி மலைக்கோட்டை பிள்ளையாரை தரிசித்து வேண்டிக் கொண்டு வீடு வந்து சேர்ந்தேன்.
அதுவரை எத்தனையோ விநாயகர் கோயில் கண்டதுண்டு. ஆனால் மலையுச்சியில் அமர்ந்து இருக்கும் விநாயகரை காண்பது அதுவே முதல் முறை. சிறு வயது, ஆகவே படிக்கட்டு ஏறுவது அத்தனை சிரமமாக இல்லை. ஆனால் அத்தனை படிக்கட்டு ஏறி அவர் சன்னதியில் நிற்கும் போது ஒரு அசாத்தியமான நம்பிக்கை மனதில் வரும் பாருங்கள், அது தான் அவருடைய சக்தி. அப்படியே ஒரு சுற்று நோக்கினால் அந்த பிரம்மாண்டம் புலப்படும். அண்ட வெளி பிரம்மாண்டத்தில் ஒரு சிறு துகள் போல பிள்ளையார். ஆனால் அவரை காண்பதற்கு எத்தனை மனிதர்கள் அத்தனை படிகளையும் தாண்டி வருகின்றனர். வாழ்க்கையின் தத்துவத்தை அவர் உணர்த்துவதாக எனக்கு தோன்றியது, அன்றிலிருந்து திருச்சி சென்றால் உச்சி பிள்ளையாரை தரிசிக்காமல் வந்ததில்லை. 
உச்சிப் பிள்ளையாரை தரிசனம் செய்யவும், அவரைப் பற்றி மேலும் விவரம் அறியவும், கீழ்க்கண்ட வலைத்தளங்களை பார்க்கவும்.



தினமலரின் 360 டிகிரி பனோரமா பார்வையில் மலைக்கோட்டை கோயில் மிகவும் பிரமாதமாக காண்பிக்கப்பட்டுள்ளது.
தரிசனம் செய்யுங்கள். நிச்சயம் உச்சிப்பிள்ளையார் உங்களை வாழ்க்கையின் உச்சிக்கு அழைத்துச் செல்லுவார்.

தரிசனம் தொடரும்.

Thursday, March 10, 2011

கணபதி தரிசனம் - 2

கணபதி தரிசனம் - 2

மதுரையை அடுத்து சிங்கார சென்னைக்கு வருவோம். 1972 - 73 ம் ஆண்டு என்று ஞாபகம்.  4 std பாதியில் மதுரையில் இருந்து சென்னை மயிலாப்பூருக்கு வந்தோம். வீடு சோலைப்ப முதலி தெரு கோடியில். தெருவின் நடுவில் மாரியம்மன் கோவிலும், கோடியில் விநாயகரும், பின்னால் ஸ்ரீனிவாச பெருமாள், கேசவ பெருமாள் கோயிலும் இருந்தன. இவை நடுவில் விநாயகர் கோயிலை ஒட்டி, வீட்டிற்கு நேராக (perpendicularly) ஒரு சந்து ஒன்று செல்லும்.  அச்சந்தின் கடைசியில் ஒரு விநாயகர் உண்டு. தினமும் காலையிலும், மாலையிலும் இந்த இரண்டு விநாயகரிடம் ஆஜர் சொல்லாமல் பள்ளிக்கு சென்றதில்லை. இரண்டு விநாயகர் சிலையும் கருங்கல்லால் ஆனது. ஆனால் பின்னால் உள்ள கண்ணாடியில் விளக்கு ஒளி பட்டு ஒளிச்சிதறலில் முகம் தத்ரூபமாக ஒளிரும்.  சந்து பிள்ளையார் கோயிலில் தினம் இரவு ஆர்த்தி உண்டு. இரவு ஆர்த்தி ஏற்பாடுகள் ஒரு விழாவுக்கு கட்டியம் கூறுவது போல் நடக்கும். வித விதமான அடுக்கு வரிசை தீபங்கள் ஏற்றப்பட்டு, வெண்கல மணியோசை ஒலிக்க இரவு நேரத்தில் ஆர்த்தி நடப்பதை காண கண்கோடி வேண்டும்.

பின்னர் அப்பா சினிமா கூட்டிச் செல்லும் போது காமதேனு தியேட்டர் அருகில் உள்ள நவசக்தி விநாயகர் கோயில் பரிச்சயமானது. மிகவும் சக்தி வாய்ந்தவர். நடைபாதையில் குடி கொண்டு இருந்த போதிலும் தன் பக்தர்களுக்கு வேண்டிய வரம் தந்து தன்னிடம் ஈர்த்துக் கொள்பவர். இப்போது நிச்சயம் பெரிய கோயிலாக மாறி இருக்கும் என்று நினைக்கிறேன். நவசக்தி விநாயகர் (Luz Pillaiyar) பற்றி மேலும் தெரிந்துக் கொள்ள இவ்வலைத்தளத்தை பார்க்கவும்
Nava Sakthi Vinayakar - Luz corner

அடுத்தவர் கபாலி கோயில் அருகில் கச்சேரி ரோடு அல்லது முண்டகக்கண்ணி அம்மன் கோயிலுக்கு செல்லும் வழியில் இருக்கும் செங்கழுநீர் பிள்ளையார்.

அடுத்து வருபவர் ETPS வரசித்தி விநாயகர். வடசென்னையில் உள்ள எண்ணூரில் அனல் மின் நிலையம் உண்டு. அதில் சித்தப்பா வேலை பார்த்து வந்தார். அதில் பணிபுரியும் பணியாளர்களுக்கு என ஒரு குடியிருப்பு எர்ணாவூரை அடுத்து அமைக்கப்பட்டிருந்தது. அதில் வசிக்கும் மக்கள் எல்லோரும் சேர்ந்து அமைத்த விநாயகர் தான் ETPS வரசித்தி விநாயகர்.

இதைத் தவிர சென்னையில் விநாயகர் கோயில் ஏராளம். அதைப் பற்றிய விவரம் அனுப்பினால் இத்தொடருக்கு மிகவும் உதவியாய் இருக்கும். என் மின் அஞ்சல் முகவரி kshetrayatraa@gmail.com

அடுத்த பதிவில் மலையுச்சியில் இருக்கும் விநாயகரை தரிசிப்போம்.

Tuesday, March 1, 2011

கணபதி தரிசனம் - 1


கணபதி தரிசனம் - 1
விபூதிப் பிள்ளையார்

என் முதல் சந்திப்பு விக்ன வினாயகர் மதுரை மீனாட்சி அம்மன் கோயில் விபூதி பிள்ளையார். பொற்றாமரை குளத்தின் தெற்கு பகுதியில் தான் உண்டு தன் சிறு வட்டம் உண்டு என்று அமைந்திருக்கும் இவரிடம் ஒரு ஈடுபாடு. சிறு வயதில் அம்மாவுடன் கோயிலுக்கு செல்லும் போதெல்லாம் அவரை கண்டு அப்படி ஒரு வியப்பு. ஏன் விபூதியை அவர் மேல் பூசுகிறார்கள், ஏன் இந்த பெயர் வந்தது என்று கேட்டு கேட்டு தொந்தரவு செய்ததுண்டு. ஆனால் இன்று வரை எனக்கு பதில் கிடைக்கவில்லை. இதைப்படிக்கும் யாருக்காவது தெரிந்தால் மின் அஞ்சலிடவும் அல்லது கமெண்ட் இடவும்.

முக்குறுணி விநாயகர்
இரண்டாவது அதே கோயிலில் வடக்கு பகுதியில், சோமசுந்தரர் சன்னதிக்கு செல்லும் வழியில் உள்ள பிரமாண்டமான முக்குறுணி பிள்ளையார். இவரிடம் என்னை ஈர்த்தது அவருக்கு நைவேத்தியமாக செய்யப்படும் கொழுக்கட்டை. அதில் உள்ள உள்ளர்த்தங்களை அறியா வயதில் கொழுக்கட்டைக்காக இப்பிள்ளையாரை சுற்றி சுற்றி வந்தததுண்டு. இவரிடம் இரண்டாவதாக பிடித்தது அவ்வளவு பிரமாண்டமாக இருந்தாலும், சிறிய இடத்தில் உட்கார்ந்து கொண்டு இருப்பது. அம்மாவிடம் இன்று வரையில் இந்த கேள்வியை கேட்பதுண்டு. இவரை பற்றி மேல் கொண்டு அறிய mukkuruni-ganesha வலத்தளத்தை சொடுக்கி பார்க்கவும். அருமையான கதை மற்றும் தத்துவம்.

கதை மற்றும் தத்துவம் என்றதும் நினைவிற்கு வருவது விநாயகர் உருவமும், அதன் தத்துவமும்....
கணபதியின் உருவத்தின் அர்த்தங்கள்
பெரிய தலை - பெரியதாக சிந்தித்தல். வெற்றிக்கான முதல்படி பெரிய அளவில் யோசிப்பது
பெரிய காதுகள் - நிறைய கேள்- மற்றவர் பேசுவதை எந்தவித குறுக்கீடும் செய்யாமல் கேட்டல். 2ம் படி

சிறிய கண்கள் - கூர்மையான கவனம். 3 ம் படி- மனதை திசை திருப்பாமல், எடுத்த காரியத்தில் கண்ணும் கருத்துமாக கவனத்தை நிறுத்துதல்.

சிறிய வாய் - குறைவாக பேசுதல் - 4 ம் படி - நிறைய கேட்க வேண்டும், படிக்க வேண்டும் ஆனால் குறைவாக பேச வேண்டும். குறைவாகவும், அளந்தும் பேசுபவருக்கு வார்த்தைகள் சொந்தம் / கட்டுப்படும் அல்லாவிடில் வார்த்தைகளுக்கு அவர் கட்டுப்படவேண்டி இருக்கும். இதைத் தான் திருவள்ளுவர் "நா காக்க, காவாக்கால் சோ காப்பர் சொல்லிழுக்குப் பட்டு" என்ற சிக்கனமாக சொன்னார்.

ஏகதந்தம் - ஒரு தந்தம் - 5ம் படி - கெட்டதை விலக்கி நல்லதை எடுத்துக் கொள்ளல். நான்காம் படி, குறிக்கோளை அடையும் வழியில் நல்லது, கெட்டது இரண்டும் வரும். அப்போது கெட்டதை விலக்கி நல்ல வழியில் செல்ல வேண்டும்.

தும்பிக்கை - தும்பிக்கை விநாயகரின் ஐந்தாவது கரமாக கருதப்படுகிறது. ஐந்து கரத்தனை, ஆனை முகத்தானை என்று அவரை வழிபடுவதுண்டு. திறமை மற்றும் சூழ்நிலைக்கேற்ப மாறும் தன்மை - 6ம் படி - திறமையும் மற்றும் சூழ்நிலைகளுக்கேற்ப தன்னை மாற்றிக் கொள்ளும் தன்மையும் மிகவும் இன்றியமையாதது.

கோடரி - அறுத்தல் - பாசம், பந்தம் போன்ற கட்டுப்பாடுகளை அறுத்தல் - 7ம் படி - இதன் அர்த்தம் ஒரு கர்மயோகியைப் போல் லட்சியத்தை (அ) குறிக்கோளை அடைய செயல்படுவது. அதில் இந்த கட்டுப்பாடுகளினால் வரும் தடைகளை ஒரு பற்றற்ற துறவியைப் போல் விலக்குதல்.

கயிறு - வாழ்வின் உண்மையான குறிக்கோளுக்கு இழுத்துச் செல்ல.- 8ம் படி -  பெரிதாக யோசித்து சாதிக்க வேண்டிய காரியத்தில் கண்ணும் கருத்துமாக கவனத்தை நிலைநிறுத்தினால், குறிக்கோளை அடைய வழிகள் தன்னால் பிறக்கும்.

அபயம் / வாழ்த்தும் கை - வாழ்த்துதல் - 9ம் படி - விநாயகரின் அபய ஹஸ்தம் தன் பக்தர்களை காக்கும் கவசம். அவர்களின் பக்தி வழியில் வரும் எல்லா தடங்கலையும் விலக்கி அவர்களை உய்விக்கும் ஒரு வரப்பிரசாதம். - வந்தவர்களை எப்போதும் நன்றாக கவனித்து, வேண்டியவற்றை தன்னால் இயன்ற அளவில் செய்தல்.

பெரிய வயிறு - ஜீரணிப்பதற்கு - 10ம் படி - தன் குறிக்கோளை அடையும் வழியில், எத்தகைய துன்பம் வந்தாலும், எத்தனை தடைகள் வந்தாலும் அத்தனையையும் பொறுமையாக சகித்து ஜீரணித்தல்.

மோதகம் (கொழுக்கட்டை) - பலன்கள் - 11ம் படி - மேல் சொன்ன படிகளின் படி சென்றால் கிடைக்கும் பலன்கள் கொழுக்கட்டை எப்படி இனிக்கின்றதோ அது போன்ற தன்மை உடையது.

மூஞ்சுறு - வாகனம் - ஆசைகள் - 12 ம் படி - ஆசைகள் எல்லாருக்கும் உண்டு. ஆனால் ஆசையை கட்டுப்படுத்தாமல் அதன்படி நடந்தால் நம்மை கீழ் நோக்கி இழுத்துச் செல்லும். ஆகையால் ஆசையை கட்டுப்படுத்தி அதை நம் வழிக்கு திருப்பி நடந்தால் அது நாம் அடைய வேண்டிய குறிக்கோள் என்ற இல்லத்திற்கு அழைத்துச் செல்லும்.

பிரசாதம் - பழங்கள் - மேல் சொன்ன வழிகளின் படி நடந்தால், இந்த உலகமே வசப்படும் மற்றும் நமக்காக காத்திருக்கும்.

தரிசனம் தொடரும்...

Photo courtesy for vibhuti and mukkuruni pillaiyar : http://theemerald.wordpress.com
and sincere thanks to the blog owner for the excellant work on ganesha.

Tuesday, February 22, 2011

கணபதி தரிசனம்

கணபதி தரிசனம்

கணபதி, விநாயகர், கணேஷ், ஐந்துகரத்தான், ஆனைமுகத்தோன் என்று பல பெயர்களால் குறிப்பிடப்படும் கணபதியை வணங்காதோர் மிக கம்மி. குழந்தைகளுக்கு மிகவும் பிடித்தமானவர். விநாயகர் ஆங்காங்கே பிரதிஷ்டை செய்யப்பட்டு வழிபடப்படுபவர். என் சிறு வயதிலிருந்தே விநாயகர் மீது பக்தியும், ப்ரியமும் அதிகம்.  விநாயகர் பற்றிய புராணக்கதைகள், அவருடைய திருவிளையாட்டு, அருமை பெருமை என எழுதிக் கொண்டே இருக்கலாம். ஆனால் என் எண்ணம்,  இந்தியா மற்றும் வெளி நாட்டில் உள்ள விநாயகர் கோயில்கள், தல புராணங்கள், சிறப்பு அம்சங்கள் முதலியவற்றை ஒரு தொகுப்பாக ஆக்குவது. என் எண்ணத்திற்கேற்ப நான் இன்று விநாயகருக்கு உகந்த மிகவும் விஷேசமான நாளான சங்கடஹர சதுர்த்தி நாளில், அவர் பாதம் பணிந்து பயணத்தை தொடங்கியுள்ளேன்.  வரும் வலைப் பதிவுகளில் ஒவ்வொரு தரிசன அனுபவத்தை பார்ப்போம்.

"சங்கட ஹர சதுர்த்தி " கூக்குள் தேடலில் கிடைத்த வலைத்தளங்களில் சிலவற்றை கீழே காணலாம். மேல் விவரம் அறிய அவ்வலைத்தளங்களுக்கு சென்று பார்க்கவும்.

குறிப்பு:
தங்கள் ஊரில் உள்ள (அல்லது தங்களுக்கு தெரிந்த) விநாயகர் கோயில் பற்றிய விவரங்களை ஒரு கட்டுரையாக்கி முடிந்தால் புகைப்படத்துடன் அனுப்பி வைக்கும் படி இப்பதிவினை படிக்கும் அத்தனை வாசகர்களிடமும் பணிவாக வேண்டிக் கொள்கிறேன். எனது மின் அஞ்சல் முகவரி : kshetrayatraa@gmail.com